廣東話其實係我嘅母語，自我介紹當然係用中文寫比較自然啦！
大家好，我係Karen，屋企人同朋友比較鍾意叫我中文名玲玲，我老公姓吳, 大家亦可以叫我吳師奶。點解我個頻道叫做 「 Canto Housewife」呢？因為我係一個識講廣東話嘅家庭主婦，「Canto」係廣東話嘅英文簡寫，「Housewife」係家庭主婦，所以「Canto Housewife」就誕生咗啦！
其實我開呢個頻道嘅主要原因係因為我放緊產假，覺得每日嘅生活都有啲一成不變，所以想同大家分享我做師奶嘅生涯，包括做一啲特別嘅一周挑戰，例如一個禮拜淨係用$50美金做曬兩個人嘅早午晚餐，做媽媽嘅心得同點滴，產後六個月減咗50磅嘅經歷，同埋我最鍾意食嘅食譜。
睇我咁珠圓玉潤個樣，你都知我係一個好為食嘅師奶啦🫶🏼 其實本身我屋企人都係好叻煮餸嘅人，所以由細到大我都好腌尖挑食。尤其是細細個時候，爸爸媽媽帶我同妹妹四圍去旅行，所以可以食到世界各地不同嘅名菜。而家帶住兩個未夠兩歲嘅仔仔，其實係去唔到咩地方。就算出街都冇得喺餐廳安安靜靜咁食餐飯。與其又要使錢，又怕影響到其他人食飯，我都係決定自己喺屋企煮我想食嘅嘢。雖然有陣時整出嚟成本係貴過出邊食好多，但係自己煮飯煮得好食嘅成功感喺無法替代嘅！
我本身係做醫療同教學生背景，所以特別鍾意同人地分享啲奇趣啊，點樣容易啲，快手啲做嘢嘅貼士等等。我嘅理念係「只要肯努力，人人都可以係廚神。」
如果你可以睇到呢一段 （除咗我媽媽之外），我已經非常之開心㗎啦！記得睇埋同訂閱我個Instagram， TikTok，同YouTube啦！我非常期待喺冇數字限制之下同你分享我生活嘅點滴！